ທຸກທ່ານອາດຈະເຄີຍໄດ້ຍິນປະໂຫຍກທີ່ວ່າ “ພະນັກງານ ຄື ຊັບສິນທີ່ມີຄ່າທີ່ສຸດຂອງອົງກອນ” ມາຫຼາຍແລ້ວ ແຕ່ຖ້າເບິ່ງໃນອີກມຸມໜຶ່ງຈາກທາງດ້ານຄວາມປອດໄພທາງໄຊເບີ (Cybersecurity) ບາງຄັ້ງພະນັກງານເອງກໍ່ເປັນຊ່ອງໂຫວ່ທີ່ອາຊະຍາກອນທາງໄຊເບີເຝົ້າຄອຍໂອກາດ ທີ່ຈະສ້າງຄວາມເສຍຫາຍໃຫ້ກັບອົງກອນຜ່ານການກະ ທຳຂອງພວກເຂົາເຊັ່ນດຽວກັນ.

ໃນການໂຈມຕີທາງໄຊເບີ (Cyber Attack) ທີ່ເກີດຂຶ້ນຊ່ວງໄລຍະ 5-7 ປີ ທີ່ຜ່ານມາ, ເຄື່ອງມືຫຼັກທີ່ກຸ່ມຜູ້ບໍ່ຫວັງດີເລືອກມາໃຊ້ໃນການໂຈມຕີອົງກອນຫຼາຍທີ່ສຸດກໍ່ຄື ມັນແວ (Malware) ແລະ ຜ່ານຮູບແບບ Phishing ໂດຍອາໄສຊ່ອງຫວ່າງທີ່ຂາດການຄໍານຶງກ່ຽວກັບໄພຄຸກຄາມທາງໄຊເບີຂອງຕົວພະນັກງານນັ້ນເອງ.

ໃນເວລາທີ່ໄພຄຸກຄາມທາງໄຊເບີຮູບແບບຕ່າງໆໄດ້ຮັບການພັດທະນາຂຶ້ນທຸກມື້ ແຕ່ຄວາມສຳນຶກຕື່ນຕົວ ແລະ ວິທີການຮັບມືຂອງພະນັກງານໃນອົງກອນຊ້ຳພັດຢຸດນິ້ງຢູ່ບ່ອນເກົ່າ. ເຖິງຢ່າງໃດກໍ່ຕາມ, ການຂາດຄວາມສຳນຶກຮູ້ໃນດ້ານຄວາມປອດໄພທາງໄຊເບີນັ້ນ ບໍ່ແມ່ນຄວາມຜິດຂອງພະນັກງານແຕ່ຢ່າງໃດ ຫາກແຕ່ເປັນຄວາມຮັບຜິດຊອບຂອງອົງກອນ ແລະ ຜູ້ຮັບຜິດຊອບວຽກດ້ານນີ້ສະເພາະ ທີ່ຕ້ອງສ້າງໃຫ້ເກີດຂຶ້ນ ເພື່ອປ້ອງກັນຄວາມສູນເສຍທີ່ອາດເກີດຂຶ້ນໃນອານາຄົດ.

ໃນມື້ນີ້ກົມຄວາມປອດໄພໄຊເບີ ຈຶ່ງຂໍແນະນຳ 7 ເຕັກນິກ ທີ່ຊ່ວຍເພີ່ມຄວາມເອົາໃຈໃສ່ ແລະ ປູກຈິດສຳນຶກໃຫ້ພະນັກງານໃນດ້ານຄວາມປອດໄພທາງໄຊເບີ ທີ່ເຄີຍກ່າວໄວ້ໂດຍທ່ານ Wesley Simpson ຜູ້ບໍລິຫານອົງກອນ ICS ແລະ ເປັນຜູ້ຊ່ຽວຊານດ້ານຄວາມປອດໄພທາງໄຊເບີ (Cybersecurity) ທີ່ໃຫຍ່ທີ່ສຸດໃນໂລກ ມາແບ່ງປັນ ເພື່ອໃຫ້ທຸກອົງກອນໄດ້ນຳໄປປັບໃຊ້ໃຫ້ເຂົ້າກັບວຽກງານຕົວຈິງ ດັ່ງນີ້:

ໃນມື້ທຳອິດຂອງການເຂົ້າມາປະຕິບັດວຽກ ພະນັກງານໃໝ່ຕ້ອງເຂົ້າຮ່ວມການຝຶກອົບຮົມຄວາມປອດໄພທາງໄຊເບີ ເພາະຖືເປັນຊ່ວງເວລາທີ່ເໝາະສົມທີ່ອົງກອນຈະສື່ສານໃຫ້ພະນັກງານ ເຂົ້າໃຈເຖິງຄວາມສຳຄັນ, ສ້າງແນວຄວາມຄິດ ແລະ ຈິດສຳນຶກທີ່ດີໃນການຄຳນຶງເຖິງການຮັກສາຄວາມປອດໄພທາງໄຊເບີ.

ແນວຄວາມຄິດການຝຶກຊ້ອມຮັບມືນີ້ ອົງກອນສາມາດກຳນົດສະຖານະການຕ່າງໆຂຶ້ນເອງໄດ້ ເຊັ່ນ ການສົ່ງອີເມວທີ່ຝັງດ້ວຍມັນແວຊຶ່ງສ້າງຂຶ້ນໂດຍໜ່ວຍງານໄອທີ ໄປຫາພະນັກງານພາຍໃນອົງກອນໂດຍບໍ່ແຈ້ງໃຫ້ຊາບລ່ວງໜ້າ ເພື່ອທົດສອບການຮັບຮູ້, ວິທີການຮັບມື ແລະ ໃຫ້ພະນັກງານໄດ້ເຫັນເຖິງຄວາມຮ້າຍແຮງຂອງໄພຄຸກຄາມທາງໄຊເບີ, ພ້ອມທັງເຂົ້າໃຈຂັ້ນຕອນປະຕິບັດຕ່າງໆ ເພື່ອຮັບມືກັບສະຖານະການທີ່ອາດເກີດຂຶ້ນຈິງ.

ຖືເປັນອີກໜ້າທີ່ໜຶ່ງຂອງຝ່າຍໄອທີພາຍໃນອົງກອນ ທີ່ຈະຕ້ອງກຳນົດແຜນວຽກ ແລະ ຂັ້ນຕອນການຮັບມືກັບເຫດການໄພຄຸກຄາມທາງໄຊເບີແຕ່ລະປະເພດ ເຊັ່ນ ເມື່ອເກີດເຫດສຸກເສີນຂຶ້ນແລ້ວ ໃຜຈະເປັນຜູ້ຮັບຜິດຊອບສ່ວນໃດ, ຈະປະຕິບັດແນວໃດ ຫຼື ດຳເນີນການດ້ວຍວິທີການໃດ ເພື່ອແກ້ໄຂສະຖານະການໃຫ້ໄດ້ໂດຍໄວທີ່ສຸດ.

ກຳນົດແຜນຝຶກອົບຮົມໃຫ້ພະນັກງານພາຍໃນອົງກອນຢ່າງເປັນປະຈຳ ເພື່ອສ້າງຈິດສຳນຶກ ແລະ ອັບເດດຄວາມຮູ້ໃໝ່ໆກ່ຽວກັບຄວາມປອດໄພທາງໄຊເບີ ເພື່ອກຽມພ້ອມຮັບມືໄພຄຸກຄຄາມທຸກປະເພດ, ຊຶ່ງເປັນຂັ້ນຕອນສຳຄັນ ແລະ ຕ້ອງກຳນົດຮູບແບບການຝຶກອົບຮົມໃຫ້ແທດເໝາະກັບແຕ່ລະພະແນກການ.

ຖ້າຫາກວ່າເປັນພະນັກງານໃນຂັ້ນວິຊາການທົ່ວໄປ ກໍ່ອາດຈະເນັ້ນໜັກໄປທີ່ການໃຫ້ຄວາມຮູ້ກ່ຽວກັບການຖືກໂຈມຕີແບບ Phishing ແລະ ມັນແວຕ່າງໆ ເພາະພວກເຂົາມີໂອກາດພົບເຫັນຫຼາຍທີ່ສຸດໃນໜ້າວຽກປະຈຳວັນຕາມອີເມວ ແລະ ຟາຍຂໍ້ມູນຕ່າງໆທີ່ເປີດໃຊ້ງານ.

ແຕ່ຖ້າເປັນພະນັກງານທີ່ເຮັດວຽກກ່ຽວຂ້ອງກັບຂໍ້ມູນລັບ ຫຼື ເຂົ້າເຖິງຂໍ້ມູນສຳຄັນຕ່າງໆຂອງອົງກອນ ກໍ່ຄວນຕ້ອງເພີ່ມຄວາມຮູ້ສຳລັບການຮັກສາຂໍ້ມູນ ແລະ ການເປີດສິດການໃຊ້ງານຂໍ້ມູນຕ່າງໆໃຫ້ກັບຜູ້ກ່ຽວ ແລະ ພະແນກການອື່ນໆພາຍໃນອົງກອນ.

ການທົດສອບ ແລະ ປະເມີນຜົນການຮັບມືກັບໄພຄູກຄາມທາງໄຊເບີ ຂອງທັງລະບົບ ແລະ ພະນັກງານພາຍໃຕ້ການຄຸ້ມຄອງຂອງໜ່ວຍງານຮັບຜິດຊອບນັ້ນ ເປັນສິ່ງທີ່ອົງກອນສາມາດເຮັດໄດ້ຕະຫຼອດປີ ເພື່ອຄົ້ນຫາຊ່ອງໂຫວ່ທີ່ອາດສ້າງຄວາມເສຍຫາຍໄດ້ໃນອານາຄົດ.

ໃນປະຈຸບັນນີ້ ຫຼາຍອົງກອນກໍ່ໃຫ້ຄວາມສຳຄັນໃນການສື່ສານພາຍໃນອົງກອນດ້ານແນວທາງການເຮັດວຽກງານ ແລະ ຂໍ້ຄວາມຈາກຫົວໜ້າເປັນຫຼັກ ແຕ່ຫາກເພີ່ມການສື່ສານກ່ຽວກັບເລື່ອງຄວາມປອດໄພທາງໄຊເບີເຂົ້າໄປ ກໍ່ເປັນອີກຊ່ອງທາງໜຶ່ງ ທີ່ຊ່ວຍໃຫ້ພະນັກງານຮັບຮູ້ເຖິງຄວາມຈິງຈັງໃນການຮັບມືໄພຄຸກຄາມທາງໄຊເບີຂອງອົງກອນ ເຖິງຈະເປັນການເຮັດວຽກແບບ Work From Home ຫຼື ເຮັດວຽກນອກສະຖານທີ່ ກໍ່ຈະຕ້ອງໃສ່ໃຈໃນດ້ານຄວາມປອດໄພທາງໄຊເບີ ຊຶ່ງເປັນສິ່ງທີ່ຕ້ອງປູກຝັງໃຫ້ພະນັກງານທຸກຄົນ.

ອີກໜຶ່ງວິທີການງ່າຍໆທີ່ໃຊ້ໄດ້ຜົນສະເໝີ ແລະ ເປັນທີ່ຖືກໃຈຫຼາຍຄົນກໍ່ຄື ອົງກອນອາດກຳນົດໃຫ້ມີການມອບລາງວັນກັບພະນັກງານທີ່ຄົ້ນພົບຊ່ອງໂຫວ່ໃນການໂຈມຕີ ອີເມວ ຫຼື ຟາຍໜ້າສົງໄສທີ່ມາພ້ອມກັບມັນແວ.

ເຖິງຢ່າງໃດກໍ່ຕາມ, ໃນພາບລວມຂອງອົງກອນນັ້ນ ອາດຈະມີພະນັກງານເກືອບທັງໝົດທີ່ເຂົ້າໃຈຄວາມປອດໄພທາງໄຊເບີເປັນຢ່າງດີ ແຕ່ກໍ່ຍັງມີໂອກາດຖືກບຸກລຸກ, ໂຈມຕີຈາກພາຍນອກໄດ້ສະເໝີ ແລະ ເປັນສິ່ງທີ່ທ້າທາຍຫຼາຍສຳລັບການປ້ອງກັນໄພຄຸກຄາມທາງໄຊເບີທຸກຮູບແບບໄດ້ຢ່າງ 100%

ດັ່ງນັ້ນແລ້ວ, ການຕອບໂຕ້ກັບໄພຄຸກຄາມທາງໄຊເບີໄດ້ຢ່າງແທ້ຈິງ ຕ້ອງອາໄສທັງດ້ານເຕັກໂນໂລຊີ, ລະບົບ, ເຄື່ອງມື, ຄວາມຮູ້ຄວາມເຂົ້າໃຈ, ຈິດສຳນຶກ ແລະ ຫຼາຍໆປັດໄຈ ມາລວມເຂົ້າກັນ ຊຶ່ງທັງໝົດນັ້ນກໍ່ເລີ່ມຕົ້ນຈາກການໃສ່ໃຈໃນດ້ານຄວາມປອດໄພທາງໄຊເບີຂອງອົງກອນນັ້ນເອງ.

ເອກະສານອ້າງອີງ: