Meta ເປີດໂ​ຕ​ເຄື່ອງ​ມື​ໃໝ່​ເທິງ​ WhatsApp ແລະ​ Messenger ເພື່ອ​ຊ່ວຍ​ໃຫ້​ຜູ້​ໃຊ້​ງານ​ສາມາດ​ປ້ອງ​ກັນ​ຕົວ​ຈາກ​ມິດ​ສາ​ຊີບ​ ແລະ ​ເພີ່ມ​ຄວາມ​ປອດໄ​ພ​ໃຫ້​ກັບ​ບັນ​ຊີ​ຂອງ​ຕົນເອງ.​

ໃນ​ທາງດ້ານຂອງ​ Messenger ບໍລິສັດ​ໄດ້​ເລີ່ມ​ທົດສອບ​ລະບົບ​ກວດ​ຈັບ​ການ​ຫອກລວງ​ຂັ້ນ​ສູງ​ສຳລັບ​ແຊັດ​ທີ່​ມີ​ຄວາມ​ໜ້າສົງໄສ​ ໂດຍ​ລະບົບ​ຈະ​ແຈ້ງ​ເຕືອນ​ຜູ້​ໃຊ້​ເມື່ອ​ໄດ້ຮັບ​ຂໍ້ຄວາມ​ຈາກ​ຜູ້​ຕິດ​ຕໍ່​ລາຍ​ໃໝ່​ທີ່​ມີ​ແນວ​ໂນ້ມ​ວ່າ​ເປັນ​ການ​ຫຼອກລວງ​ ພ້ອມ​ຕົວ​ເລືອກ​ໃຫ້​ສົ່ງ​ຂໍ້ຄວາມ​ຫຼ້າສຸດ​ໄປ​ໃຫ້​ AI ວິ​ເຄາະ​ເພີ່ມເຕີມ​.

ຫາກ​ກວດ​ພົບ​ຄວາມ​ສ່ຽງ​ວ່າ​ເປັນ​ການ​ຫຼອກລວງ​ ຜູ້​ໃຊ້​ຈະ​ໄດ້ຮັບ​ການ​ແຈ້ງ​ເຕືອນ​ ພ້ອມ​ຄຳ​ແນະ​ນຳ​ວິທີ​ການ​ຮັບ​ມື​ ເຊັ່ນ​: ການ​ບ​ລັອກ​ ຫຼື​ ລາຍ​ງານ​ຜູ້​ສົ່ງ​ຂໍ້ຄວາມ​.

Meta ລະ​ບຸ​ວ່າ​ “ຫາກ​ລະບົບ​ກວດ​ພົບ​ຄວາມ​ສ່ຽງ​ວ່າ​ອາດຈະ​ເປັນ​ການ​ຫຼອກລວງ​ ຜູ້​ໃຊ້​ຈະ​ໄດ້ຮັບ​ຂໍ້​ມູນ​ກ່ຽວກັບ​ກົນ​ໂກງ​ຮູບ​ແບບ​ຕ່າງ​ໆ​ ທີ່ພົບໄດ້​ເລື້ອຍໆ​ ພ້ອມ​ຄຳ​ແນະ​ນຳ​ ເຊັ່ນ:​ ການ​ບ​ລັອກ​ ລາຍ​ງານ​ບັນຊີ​ທີ່​ໜ້າສົງໄສ​”

ຄຸນສົມບັດ​ນີ້​ຖືກ​ຕັ້ງ​ຄ່າ​ໃຫ້​ເປີດ​ໃຊ້​ງານ​ໂດຍ​ອັດຕະ​ໂນ​ມັ​ດ ແຕ່ຖ້າ​ຫາກ​ບໍ່​ຕ້ອງ​ການ​ໃຊ້​ງານ​ ຜູ້​ໃຊ້​ສາມາດ​ປິດ​ໄດ້​ໂດຍ​ເຂົ້າໄປ​ທີ່​ເມ​ນູ​ "ການຕັ້ງ​ຄ່າ​ຄວາມ​ເປັນ​ສ່ວນ​ຕົວ​ ແລະ​ ຄວາມ​ປອດໄ​ພ​ (Privacy & safety settings)" ແລ້ວ​ສະ​ຫຼັບ​ປິດ​ຕົວ​ເລືອກ​ "ການ​ກວດ​ຈັບ​ການ​ຫຼອກລວງ (Scam detection)​".

Meta ໄດ້​ເພີ່ມ​ລະບົບ​ແຈ້ງ​ເຕືອນ​ໃໝ່​ໃນ​ WhatsApp ເພື່ອ​ແນະ​ນຳ​ໃຫ້​ຜູ້​ໃຊ້​ແຊ​ຣ໌​ໜ້າຈໍ​ສະເພາະ​ກັບ​ບຸກ​ຄົນ​ທີ່​ໄວ້​ວາງ​ໃຈ​ເທົ່າ​ນັ້ນ​ ເມື່ອ​ຕ້ອງ​ເລີ່ມ​ວິ​ດີ​ໂອຄໍ​ກັບ​ຜູ້​ຕິດ​ຕໍ່​ທີ່​ບໍ່​ຮູ້​ຈັກ​.

ເນື່ອງ​ຈາກ​ມິດ​ສາ​ຊີບ​ມັກ​ໃຊ້​ວິທີ​ຫຼອກ​ລໍ້​ ຫຼື ​ກົດ​ດັນ​ເຫຍື່ອ​ໃຫ້​ແຊ​ຣ໌​ໜ້າຈໍ ເພື່ອ​ເຂົ້າ​ເຖິງ​ຂໍ້​ມູນ​ສຳຄັນ​ ເຊັ່ນ​: ລາຍ​ລະອຽດ​ບັນ​ຊີທະ​ນາ​ຄານ​ ຫຼື ​ລະ​ຫັດ​ຢືນຢັນ​ ລະບົບ​ໃໝ່​ນີ້​ຈຶ່ງ​ຖືກ​ພັດທະນາ​ຂຶ້ນ​ເພື່ອ​ຊ່ວຍ​ໃຫ້​ຜູ້​ໃຊ້ຮັບຮູ້​ເຖິງ​ຄວາມ​ສ່ຽງ​ ແລະ ​ຫຼີກ​ລ້ຽງ​ການ​ຕົກ​ເປັນ​ເຫຍື່ອ​ຂອງ​ການ​ຫຼອກລວງ​ໄດ້​ງ່າຍ​ຂຶ້ນ​.

ໃນ​ ເດືອນ​ ສິງ​ຫາ WhatsApp ໄດ້​ເປີດ​ໂຕຄຸນສົມບັດ​ຄວາມ​ປອດໄ​ພ​ໃໝ່​ ທີ່​ຊ່ວຍ​ຜູ້​ໃຊ້​ຮັບຮູ້​ເຖິງ​ການ​ຫຼອກລວງ​ເມື່ອ​ຕ້ອງ​ຖືກ​ເພີ່ມ​ເຂົ້າ​ກຸ່ມ​ແຊັດ​ຈາກ​ຜູ້​ຕິດ​ຕໍ່​ທີ່​ບໍ່​ຮູ້​ຈັກ​.

ຄຸນສົມບັດນີ້​ຈະ​ສະແດງ​ “ພາບລວມ​ຄວາມ​ປອດໄ​ພ​” ທີ່​ມີ​ຂໍ້​ມູນ​ກ່ຽວກັບ​ວັນທີ​ສ້າງ​ກຸ່ມ​, ຈຳນວນ​ສະມາຊິກ​, ຄວາມ​ສ່ຽງ​ຈາກ​ກົນ​ໂກງ​ ແລະ​ ຄໍາ​ແນະ​ນຳ​ວິທີ​ຄວບ​ຄຸມ​ວ່າ​ໃຜ​ສາມາດ​ເພີ່ມທ່ານ​ເຂົ້າ​ກຸ່ມ​ WhatsApp ໄດ້​ຢ່າງ​ລະອຽດ.​

ເພື່ອປົກປ້ອງ​ຜູ້​ໃຊ້​ຈາກ​ມິດ​ສາ​ຊີບ​ທີ່​ພະຍາຍາມ​ຕິດ​ຕໍ່​ໂດຍ​ກົງ​ WhatsApp ຍັງ​ແຈ້ງ​ເຕືອນ​ຜູ້​ໃຊ້​ເມື່ອ​ມີ​ຄົົນທີ່​ບໍ່​ຢູ່ໃນ​ລາຍ​ຊື່​ຜູ້​ຕິດ​ຕໍ່​ສົ່ງ​ຂໍ້ຄວາມ​ມາ​ ພ້ອມ​ສະແດງ​ຂໍ້​ມູນ​ເພີ່ມເຕີມ​ກ່ຽວກັບ​ບຸກ​ຄົນ​ນັ້ນ ​ເພື່ອ​ໃຫ້​ຜູ້​ໃຊ້​ຮັບ​ຮູ້ບໍລິບົດຫຼາຍ​ຂຶ້ນ​.

Meta ຍັງ​ເປີດ​ເຜີຍ​ໃນ​ອາທິດທີ່ແລ້ວ​ນີ້​ວ່າ​ ບໍລິສັດ​ໄດ້​ລະ​ງັບ​ບັນ​ຊີ​​ເກືອບ​ 8 ລ້ານ​ບັນ​ຊີ ​ຕັ້ງ​ແຕ່​ຕົ້ນ​ປີ​ ຊຶ່ງ​ເຊື່ອມ​ໂຍງ​ກັບ​ສູນ​ຫຼອກລວງ​ໃນ​ ລາວ​, ກໍາປູເຈຍ​, ມຽນ​ມາ​, ສະຫະລັດອາຣັບເອມິເຣດ​ ແລະ​ ຟີລິບ​ປິນ​.

ນອກ​ຈາກ​ນີ້​, ຍັງ​ລຶບ​ເພສ (Page)​ ແລະ ​ບັນ​ຊີປອມ​ເຖິງ​ 21,000 ລາຍ​ການ​ ທີ່​ແອບ​ອ້າງ​ເປັນ​ຝ່າຍ​ບໍລິການ​ລູກ​ຄ້າ​ ແລະ ​ພະຍາຍາມ​ຫຼອກ​ເຫຍື່ອ​ໃຫ້​ເປີດ​ເຜີຍ​ຂໍ້​ມູນ​ສຳຄັນ​.

ໃນ​ຕົ້ນ​ປີ​ນີ້​ ບໍລິສັດ​ໄດ້​ຮ່ວມ​ມື​ກັບ​ OpenAI ໃນ​ການ​ປິດ​ສູນ​ຫລອກລວງ​ອາດຊະຍາກໍາ​ໃນ ກໍາປູເຈຍ​ ຊຶ່ງ​ກ່ຽວ​ຂ້ອງ​ກັບ​ກົນ​ໂກງ​ຫຼາກ​ຫຼາຍ​ປະ​ເພດ​ ຕັ້ງ​ແຕ່​ການ​ຈ່າຍ​ເງິນ​ເພື່ອ​ແລກ​ກັບ​ການ​ກົດ​ Like ປອມ,​ ການ​ຊັກຊວນ​ເຫຍື່ອ​ເຂົ້າ​ຮ່ວມ​ແຊ​ຣ໌​ລູກ​ໂສ້, ​ການ​ເຊົ່າ​ລົດ​ສະ​ກູດ​ເຕີ​​ ​ຈົນ​ເຖິງ​ການ​ລໍ້ລວງ​ໃຫ້​ລົງ​ທຶນ​ໃນ​ສ​ະກຸນ​ເ​ງິ​ນຄຣິບໂຕ.​

ເອກະສານອ້າງອີງ:

1. https://www.bleepingcomputer.com/news/security/meta-launches-new-anti-scam-tools-for-whatsapp-and-messenger/
2. https://www.i-secure.co.th/2025/10/meta-%e0%b9%80%e0%b8%9b%e0%b8%b4%e0%b8%94%e0%b8%95%e0%b8%b1%e0%b8%a7%e0%b9%80%e0%b8%84%e0%b8%a3%e0%b8%b7%e0%b9%88%e0%b8%ad%e0%b8%87%e0%b8%a1%e0%b8%b7%e0%b8%ad%e0%b8%9b%e0%b9%89%e0%b8%ad%e0%b8%87/