ການພັດທະນາຂອງອິນເຕີເນັດ ແລະ ສື່ສັງຄົມອອນລາຍໄດ້ສ້າງໂອກາດໃຫ້ຄົນເຮົາສາມາດສື່ສານ ແລະ ແລກປ່ຽນຂໍ້ມູນໄດ້ງ່າຍຂຶ້ນ. ແຕ່ພ້ອມກັນນັ້ນ, ກໍ່ໄດ້ເກີດມີຮູບແບບຂອງການລ່ວງລະເມີດອອນລາຍໃໝ່ໆຂຶ້ນ ຊຶ່ງໜຶ່ງໃນບັນຫາທີ່ຮ້າຍແຮງຄື: ການເຜີຍແຜ່ຮູບພາບສ່ວນຕົວໂດຍບໍ່ໄດ້ຮັບອະນຸຍາດ (Non-Consensual Intimate Images – NCII) ຫຼື ທີ່ມັກເອີ້ນວ່າ “revenge ****” ເຊິ່ງແມ່ນການນຳຮູບພາບສ່ວນຕົວ ຫຼື ຮູບພາບທີ່ເປັນຄວາມລັບມາເຜີຍແຜ່ໃນອິນເຕີເນັດໂດຍບໍ່ຮັບການຍິນຍອມຈາກເຈົ້າຂອງຮຸບພາບ.

ພຶດຕິກໍາແບບນີ້ສ້າງຜົນກະທົບຢ່າງຮ້າຍແຮງຕໍ່ຜູ້ຖືກເຄາະຮ້າຍ ທັງດ້ານ ຈິດໃຈ, ສັງຄົມ ແລະ ວຽກງານ. ເພື່ອຊ່ວຍແກ້ໄຂບັນຫານີ້, ຈຶ່ງມີການພັດທະນາເຄື່ອງມືອອນລາຍລະດັບສາກົນຊື່ StopNCII.org ເພື່ອຊ່ວຍປົກປ້ອງຜູ້ຖືກເຄາະຮ້າຍຈາກການເຜີຍແຜ່ຮູບພາບສ່ວນຕົວ.

StopNCII.org ແມ່ນຫຍັງ?

StopNCII.org ແມ່ນເຄື່ອງມືອອນລາຍຟຣີ ທີ່ຊ່ວຍໃຫ້ທຸກຄົນສາມາດປົກປ້ອງຮູບພາບ ຫຼື ວິດີໂອສ່ວນຕົວຂອງຕົນ ບໍ່ໃຫ້ຖືກນຳໄປເຜີຍແຜ່ໃນອິນເຕີເນັດ. ເຄື່ອງມືນີ້ເປີດໃຫ້ຜູ້ທີ່ກັງວົນວ່າຮູບພາບສ່ວນຕົວອາດຈະຖືກເຜີຍແຜ່ ສາມາດດຳເນີນການປ້ອງກັນໄດ້ລ່ວງໜ້າ.

StopNCII.org ເຮັດວຽກແນວໃດ?

ລະບົບຂອງ StopNCII.org ໃຊ້ເຕັກໂນໂລຊີທີ່ເອີ້ນວ່າ Image Hashing ເພື່ອສ້າງ “ລາຍນິ້ວມືດິຈິຕອນ” ຂອງຮູບພາບ ຫຼື ວິດີໂອ. ລາຍນິ້ວມືນີ້ຊ່ວຍໃຫ້ແພລດຟອມອອນລາຍສາມາດກວດພົບ ແລະ ປ້ອງກັນການອັບໂຫຼດເນື້ອຫາດັ່ງກ່າວ.

ຂັ້ນຕອນເຮັດວຽກໂດຍຫຍໍ້ມີດັ່ງນີ້:

1. ຜູ້ໃຊ້ເລືອກຮູບພາບ ຫຼື ວິດີໂອສ່ວນຕົວຢູ່ໃນອຸປະກອນຂອງຕົນ;
2. ລະບົບຈະສ້າງ ລາຍນິ້ວມືດິຈິຕອນ (Hash) ຂອງຟາຍນັ້ນ;
3. ຮູບພາບຕົ້ນສະບັບຈະ ບໍ່ຖືກອັບໂຫຼດ ຫຼື ເກັບໄວ້ ໃນລະບົບ;
4. Hash ຈະຖືກແບ່ງປັນໃຫ້ກັບແພລດຟອມອອນລາຍທີ່ຮ່ວມມື;
5. ຖ້າມີຜູ້ພະຍາຍາມອັບໂຫຼດຮູບພາບດຽວກັນ ລະບົບຈະກວດພົບ ແລະ ປ້ອງກັນການເຜີຍແຜ່.

ເປັນຫຍັງເຄື່ອງມືນີ້ຈຶ່ງສຳຄັນ?

ຜູ້ຖືກເຄາະຮ້າຍຈາກການເຜີຍແຜ່ຮູບພາບສ່ວນຕົວ ມັກພົບກັບຄວາມຫຍຸ້ງຍາກໃນການນຳຮູບພາບເຫຼົ່ານັ້ນອອກຈາກອິນເຕີເນັດ. StopNCII.org ຊ່ວຍຫຼຸດຜ່ອນການເຜີຍແຜ່ໃນວົງກວ້າງຂອງຮູບພາບ ແລະ ໃຫ້ຜູ້ຖືກເຄາະຮ້າຍມີການຄວບຄຸມຂໍ້ມູນສ່ວນຕົວຂອງຕົນຫຼາຍຂຶ້ນ.

ຂໍ້ແນະນຳເພື່ອຄວາມປອດໄພອອນລາຍ

• ບໍ່ຄວນເຜີຍແຜ່ຮູບພາບສ່ວນຕົວຂອງຜູ້ອື່ນໂດຍບໍ່ໄດ້ຮັບການຍິນຍອມ;
• ຖ້າມີການຂົ່ມຂູ່ຈະເຜີຍແຜ່ຮູບພາບສ່ວນຕົວ ຄວນຂໍຄວາມຊ່ວຍເຫຼືອທັນທີ;
• ໃຊ້ເຄື່ອງມືທີ່ໜ້າເຊື່ອຖື ເຊັ່ນ: StopNCII.org ເພື່ອປ້ອງກັນການແຜ່ກະຈາຍຮູບພາບ;
• ແຈ້ງລາຍງານພຶດຕິກຳການລ່ວງລະເມີດໃຫ້ແພລດຟອມອອນລາຍ ຫຼື ໜ່ວຍງານທີ່ກ່ຽວຂ້ອງ.

ສະຫຼຸບ:

ການເຜີຍແຜ່ຮູບພາບສ່ວນຕົວໂດຍບໍ່ໄດ້ຮັບອະນຸຍາດ ແມ່ນຮູບແບບໜຶ່ງຂອງການລ່ວງລະເມີດທາງອອນລາຍທີ່ຮ້າຍແຮງ. ການຮູ້ທັນບັນຫາ ແລະ ການນຳໃຊ້ເຄື່ອງມື ເຊັ່ນ: StopNCII.org ຈະຊ່ວຍປົກປ້ອງຄວາມເປັນສ່ວນຕົວ ແລະ ຫຼຸດຜ່ອນການເຜີຍແຜ່ໃນວົງກວ້າງຂອງເນື້ອຫາທີ່ອັນຕະລາຍໃນອິນເຕີເນັດ.

ເອກະສານອ້າງອີງ:

1. https://stopncii.org/
2. https://www.itv.com/news/2024-11-26/over-1m-intimate-images-now-protected-from-being-shared-around-online
3. https://swgfl.org.uk/helplines/stopncii
4. https://www.csrindia.org/non-consensual-sharing-of-intimate-images
5. https://downloads.regulations.gov/NIST-2023-0009-0063/attachment_1.pdf